Gujarat
CBI ટીમને ધક્કો મારીને DGFTના જોઈન્ટ ડાયરેક્ટર ચોથા માળેથી કૂદી પડ્યા, ઘરમાંથી મળ્યા 1 કરોડ રૂપિયા
સેન્ટ્રલ બ્યુરો ઑફ ઇન્વેસ્ટિગેશન (CBI) એ શુક્રવારે ગુજરાતના રાજકોટમાં ડાયરેક્ટોરેટ જનરલ ઑફ ફોરેન ટ્રેડ (DGFT) ના ડિરેક્ટરની ધરપકડ કરી હતી. ધરપકડ કરાયેલા આ અધિકારીનું નામ જવરીમલ બિશ્નોઈ હતું. જેઓ ડીજીએફટીમાં જોઈન્ટ ડાયરેક્ટર તરીકે પોસ્ટેડ હતા. 5 લાખની લાંચ લેવાના કેસમાં સીબીઆઈએ તેની ધરપકડ કરી હતી.
શનિવારે જ્યારે સીબીઆઈની ટીમ રાજકોટમાં તેની ઓફિસ અને ઘરે દરોડા પાડવા ગઈ હતી. ત્યારબાદ જવરીમલે સીબીઆઈ અધિકારીઓને ધક્કો માર્યો અને ચોથા માળની બારી પરથી કૂદીને આત્મહત્યા કરી લીધી. દરોડા દરમિયાન સીબીઆઈએ ઘર અને ઓફિસમાંથી 1 કરોડ રૂપિયા રિકવર કર્યા હતા.
બેગ ફેંકવાની ઘટના CCTVમાં કેદ
તે જ સમયે, જ્યારે સીબીઆઈની ટીમ ઘરે પહોંચી ત્યારે આ અધિકારીની પત્નીએ પોતાને એક રૂમમાં બંધ કરી દીધી હતી. રાત્રિ દરમિયાન પાર્કિંગમાં છત પરથી રોકડ ભરેલી બેગ ફેંકી દીધી હતી. જે તેમના ભત્રીજાએ ઉપાડી લીધો હતો. આવી જ બીજી રોકડ ભરેલી બેગ અધિકારીની પત્નીએ પાડોશીના ઘરે મોકલી હતી. ટેરેસ પરથી બેગ ફેંકી દેવાના સીસીટીવી ફૂટેજ પણ સામે આવ્યા છે. સીબીઆઈએ બંને બેગમાંથી લગભગ 1 કરોડ રૂપિયા રિકવર કર્યા છે. સીબીઆઈએ આ મામલાની તપાસ આગળ વધારી છે.
ડૉક્ટરોએ બિશ્નોઈને મૃત જાહેર કર્યા
આ મામલે વધુ વિગતો આપતા ડીસીપી સુધીર દેસાઈએ જણાવ્યું હતું કે બિશ્નોઈ ટેરેસ પરથી કૂદીને ગંભીર રીતે ઘાયલ થયા હતા. તેને ઈજાગ્રસ્ત હાલતમાં હોસ્પિટલમાં લઈ જવામાં આવ્યો હતો. જ્યાં તબીબોએ તેને તાત્કાલિક મૃત જાહેર કર્યો હતો. આ સાથે દેસાઈએ કહ્યું કે બિશ્નોઈની પાંચ લાખ રૂપિયાની લાંચ લેતા ધરપકડ કરવામાં આવી હતી.
બિશ્નોઈ સમાજે વિરોધ કર્યો હતો
જવરીમલની હત્યા બાદ તેના ભાઈ સંજય ગીલાએ પોલીસ પ્રશાસન પર સવાલો ઉભા કર્યા છે. તેના ભાઈની સાથે બિશ્નોઈ સમુદાયના લોકો પણ હોસ્પિટલની બહાર વિરોધ કરવા પહોંચ્યા હતા. ભાઈ સંજયે જવરીમલના મૃતદેહના પોસ્ટમોર્ટમની માંગ પોલીસ સમક્ષ મૂકી છે.