Business
નાણામંત્રીએ બેંકો માટે આપ્યો નવો આદેશ, હવે ગ્રાહકોને મળશે સીધો ફાયદો

નાણા મંત્રાલય ખેડૂતોની આવક વધારવા પર સતત ધ્યાન આપી રહ્યું છે. આના સંદર્ભે, નાણા મંત્રાલયે હવે બેંકોને દેશના પછાત જિલ્લાઓમાં લોન વિતરણ વધારવા માટે સૂચના આપી છે. મંત્રાલય દ્વારા બેંકોને સૂચના આપવામાં આવી હતી કે દરેક ગામની પાંચ કિલોમીટરની ત્રિજ્યામાં ઓછામાં ઓછી એક બેંક હાજર હોવી જોઈએ. તેનો હેતુ ખેડૂતોને સરળ લોન આપવાનો અને તેમની આર્થિક સ્થિતિને મજબૂત કરવાનો છે. અગાઉ, સરકાર દ્વારા દેશના દરેક ખેડૂતને ક્રેડિટ કાર્ડ જારી કરવાની સૂચના પણ આપવામાં આવી હતી.
નાણાકીય શિક્ષણ શિબિર યોજવા વિનંતી
બેંકિંગ સચિવ વિવેક જોશીની અધ્યક્ષતામાં મહત્વાકાંક્ષી જિલ્લાઓના લીડ ડિસ્ટ્રિક્ટ મેનેજર (LDM) અને સ્ટેટ લેવલ બેંક કમિટી (SLBC) કન્વીનરોની સમીક્ષા બેઠક દરમિયાન લક્ષિત નાણાકીય સમાવેશક હસ્તક્ષેપ કાર્યક્રમ (TFIIP) હેઠળ 112 પછાત જિલ્લાઓની પ્રગતિની ચર્ચા કરવામાં આવી હતી. નાણાંકીય સમાવેશ યોજનાઓની કામગીરીમાં વધુ સુધારો કરવા માટે પંચાયતી રાજ સંસ્થાઓની મદદથી ગામડાઓમાં નાણાકીય શિક્ષણ શિબિરોનું આયોજન કરવા બેંકોને પણ વિનંતી કરવામાં આવી હતી.
પુરસ્કારો અને પ્રોત્સાહનો આપવામાં આવશે
આ સાથે, વધુ સારું પ્રદર્શન કરનાર જિલ્લાઓ અને SLBC ને પુરસ્કારો અને પ્રોત્સાહનો પણ આપવામાં આવશે. જોશીએ દેશમાં નાણાકીય સમાવેશની ઝુંબેશને પ્રોત્સાહન આપવા માટે SLBCs અને LDMsના પ્રયાસોની પ્રશંસા કરી હતી. તેમજ તેમના સંયોજકોને આગામી છ મહિનામાં નવી ઉર્જા અને ઉત્સાહ સાથે કામ કરવા અનુરોધ કર્યો હતો જેથી ધ્યેયો સિદ્ધ થાય.
NITI આયોગ, પંચાયતી રાજ અને નાણાં મંત્રાલયના નાણાકીય સેવાઓ વિભાગ (DFS) ના વરિષ્ઠ અધિકારીઓએ પણ સમીક્ષા બેઠકમાં ભાગ લીધો હતો. વડાપ્રધાન નરેન્દ્ર મોદી દ્વારા જાન્યુઆરી 2018માં શરૂ કરવામાં આવેલ એસ્પિરેશનલ ડિસ્ટ્રિક્ટ્સ પ્રોગ્રામ (ADP)નો હેતુ દેશના 112 સૌથી પછાત જિલ્લાઓમાં ઝડપી અને અસરકારક પરિવર્તન લાવવાનો છે.