National
મુસ્લિમ પક્ષને લાગ્યો આંચકો, તાત્કાલિક શરૂ થશે જ્ઞાનવાપીના ASIનો સર્વે, અલ્હાબાદ હાઈકોર્ટનો મોટો નિર્ણય
ગુરુવારે અલાહાબાદ હાઈકોર્ટે વારાણસીની જ્ઞાનવાપી મસ્જિદ સંબંધિત મામલામાં મહત્વનો ચુકાદો આપ્યો. કેમ્પસમાં ASI સર્વે ચાલુ રાખવા માટે હાઈકોર્ટે સૂચના આપી છે. મુસ્લિમ પક્ષે આ સર્વે સામે અપીલ કરી હતી, જેને કોર્ટે ફગાવી દીધી છે. હવે કોર્ટના નિર્ણય બાદ તરત જ જ્ઞાનવાપીમાં સર્વેની કામગીરી શરૂ થશે.
હાઈકોર્ટના નિર્ણય સામે હવે મુસ્લિમ પક્ષ પોતાની અપીલ સાથે સુપ્રીમ કોર્ટમાં જશે. મુસ્લિમ પક્ષના વકીલ હુઝૈફા અહમદીએ કહ્યું છે કે અમારી પાસે સુપ્રીમ કોર્ટમાં જવાનો વિકલ્પ છે, અમારી આશા હજુ બાકી છે. હિંદુ પક્ષે પણ સુપ્રીમ કોર્ટમાં કેવિયેટ દાખલ કરવાનો નિર્ણય લીધો છે, એટલે કે કોઈપણ નિર્ણય જારી કરતા પહેલા તેમની બાજુ સાંભળવા માટે કોર્ટને અપીલ કરવામાં આવી છે.
કોર્ટે શું આપ્યો નિર્ણય?
હિંદુ પક્ષના વકીલ વિષ્ણુ શંકર જૈને કોર્ટના નિર્ણય પર નિવેદન આપ્યું છે કે કોર્ટે સર્વેને મંજૂરી આપી છે. એએસઆઈએ પોતાનું સોગંદનામું આપી દીધું છે અને કોર્ટનો આદેશ આવી ગયો છે, તેથી હવે કોઈ પ્રશ્ન ઊભો થતો નથી. વકીલે કહ્યું કે કોર્ટે મુસ્લિમ પક્ષની દલીલોને ફગાવી દીધી છે. હાઈકોર્ટના નિર્ણય બાદ પ્રતિક્રિયાઓ પણ આવવા લાગી છે.
યુપીના ડેપ્યુટી સીએમ કેશવ પ્રસાદ મૌર્યએ નિવેદન આપ્યું છે કે રામમંદિરનો નિર્ણય થતાં જ સર્વેમાંથી સત્ય બહાર આવશે. હવે તમામ શિવભક્તોની મનોકામના પૂર્ણ થશે. બીજેપી સાંસદ લક્ષ્મીકાંત વાજપેયીએ પણ નિવેદન આપ્યું હતું અને તેમણે કહ્યું હતું કે અમે નિર્ણયનું સ્વાગત કરીએ છીએ, સાથે જ હું મુસ્લિમ સમુદાયને અપીલ કરું છું કે તેઓ સત્ય સ્વીકારવાની હિંમત દાખવે.
જ્ઞાનવાપી મસ્જિદ કેસમાં અત્યાર સુધી શું થયું?
તમને જણાવી દઈએ કે વારાણસીની જ્ઞાનવાપી મસ્જિદનો મામલો છેલ્લા કેટલાક સમયથી ચર્ચામાં છે, આ પરિસરમાં શિવલિંગ હોવાનો દાવો કરવામાં આવી રહ્યો છે. વર્ષ 2021માં મા શ્રૃંગાર ગૌરી સ્થળ પર પૂજા કરવાની પરવાનગી માંગતી અરજી કોર્ટમાં દાખલ કરવામાં આવી હતી.
આ મામલો નીચલી કોર્ટ દ્વારા હાઈકોર્ટ અને સુપ્રીમ કોર્ટમાં પહોંચ્યો છે. મહિલાઓની અરજી બાદ નીચલી અદાલતે મસ્જિદ પરિસરમાં સર્વે કરવાનો આદેશ આપ્યો હતો, આ દરમિયાન ગયા વર્ષે હિન્દુ પક્ષે દાવો કર્યો હતો કે મસ્જિદના તળાવમાં શિવલિંગ આવેલું છે.
સ્થાનિક કોર્ટના આદેશ બાદ મસ્જિદ પરિસરમાં ASIનો સર્વે શરૂ થયો ત્યારે મુસ્લિમ પક્ષે તેનો વિરોધ કર્યો હતો. મુસ્લિમ પક્ષે આના વિરુદ્ધ સુપ્રીમ કોર્ટમાં અરજી કરી હતી, ત્યારબાદ સુપ્રીમ કોર્ટે તેમને હાઈકોર્ટમાં જવા કહ્યું હતું. હાઈકોર્ટે ભૂતકાળમાં આ મુદ્દાની સુનાવણી કરી હતી અને 3 ઓગસ્ટ માટે પોતાનો નિર્ણય અનામત રાખ્યો હતો. હવે હાઈકોર્ટે સ્પષ્ટ કર્યું છે કે સર્વે ચાલુ રાખવામાં આવશે, જો કે, મસ્જિદ પરિસરને કોઈ નુકસાન ન થાય તેનું પણ ધ્યાન રાખવું પડશે.