International
ઇઝરાયેલમાં પીએમ નેતન્યાહુએ બનાવી નવી સરકાર, શપથગ્રહણની તારીખ હજુ નક્કી નથી
ઘણી જહેમત બાદ હવે વડાપ્રધાન બેન્જામિન નેતન્યાહુએ બુધવારે મોડી રાત્રે ઇઝરાયેલમાં સરકાર બનાવવાની જાહેરાત કરી હતી. તેમણે રાષ્ટ્રપતિ આઇઝેક હર્ઝોગને કહ્યું કે તેઓ 38 દિવસની ગઠબંધન વાટાઘાટો બાદ સરકાર રચવામાં સફળ થયા છે. આ જાહેરાત બાદ નેતન્યાહુ હવે ઈઝરાયેલ સરકારના વડા તરીકે પરત ફરી રહ્યા છે.
સરકાર સ્થાપવામાં સક્ષમ
વડા પ્રધાન બેન્જામિન નેતન્યાહુએ ટ્વીટ કર્યું હતું કે છેલ્લી ચૂંટણીઓમાં અમને મળેલા જબરજસ્ત જનસમર્થન માટે આભાર, હું એવી સરકાર સ્થાપિત કરવામાં સફળ રહ્યો છું જે તમામ ઇઝરાયેલના નાગરિકોના હિત માટે કામ કરશે. નેતન્યાહુએ મધ્યરાત્રિની સમયમર્યાદાની ક્ષણો પહેલાં રાષ્ટ્રપતિ આઇઝેક હરઝોગને ફોન કૉલ દરમિયાન આ જાહેરાત કરી હતી.
ટૂંક સમયમાં પ્રક્રિયા પૂર્ણ કરશે
નેતન્યાહુએ કહ્યું કે તેઓ આવતા અઠવાડિયે જલ્દી પ્રક્રિયા પૂર્ણ કરશે. જોકે, તેમણે શપથગ્રહણની તારીખ જાહેર કરી ન હતી. નેતન્યાહુ આદેશ પ્રાપ્ત કર્યાના એક અઠવાડિયા કરતાં ઓછા સમયમાં નવી સરકાર બનાવવાની યોજના ધરાવે છે, પરંતુ તેમના ગઠબંધન ભાગીદારો સરકારના શપથ લીધા પછી તેમણે કરેલા વચનો પૂરા કરવા માટે તેમના પર વિશ્વાસ કરતા નથી.