National
બાંગ્લાદેશના વિદેશ મંત્રી સાથે એસ જયશંકરે દ્વિપક્ષીય સંબંધો પર કરી ચર્ચા, ઘણા મુદ્દાઓ પર ચર્ચા કરી
વિદેશ મંત્રી એસ જયશંકરે તેમના બાંગ્લાદેશી સમકક્ષ હસન મહમૂદ સાથે સંરક્ષણ અને આર્થિક સહયોગ અને દ્વિપક્ષીય સંબંધોને વધુ મજબૂત કરવા સહિતના અનેક મુદ્દાઓની ચર્ચા કરી હતી. બાંગ્લાદેશના વિદેશ મંત્રી હસન મહમૂદ 7 થી 9 ફેબ્રુઆરી દરમિયાન ભારતની સત્તાવાર મુલાકાતે છે.
વિદેશ મંત્રીએ મહેમૂદ માટે ડિનરનું આયોજન કર્યું હતું
ગયા મહિને સંસદીય ચૂંટણીમાં પ્રચંડ બહુમતી સાથે બાંગ્લાદેશમાં વડાપ્રધાન શેખ હસીના પાંચમી વખત સત્તામાં આવ્યા બાદ મહમૂદની આ પ્રથમ વિદેશ યાત્રા છે. જયશંકરે મેહમૂદ સાથે પ્રતિનિધિમંડળ સ્તરની વાતચીત કરી હતી અને બુધવારે તેમના સન્માનમાં રાત્રિભોજનનું પણ આયોજન કર્યું હતું.
બંને નેતાઓ વચ્ચે અનેક મુદ્દાઓ પર ચર્ચા થઈ હતી
વિદેશ મંત્રાલયે જણાવ્યું કે વાતચીત દરમિયાન બંને મંત્રીઓએ બંને દેશો વચ્ચે સીમા પાર કનેક્ટિવિટી, આર્થિક અને વિકાસ ભાગીદારી, સંરક્ષણ અને સુરક્ષા સહયોગ, પાવર, ઉર્જા, જળ સંસાધનો વગેરેમાં પ્રગતિની પણ સમીક્ષા કરી. બાંગ્લાદેશના વિદેશ મંત્રીએ રાષ્ટ્રીય સુરક્ષા સલાહકાર અજીત ડોભાલ સાથે પણ વાત કરી હતી.
આ દરમિયાન તેમણે મ્યાનમારમાં બગડતી સુરક્ષા સ્થિતિને ભારત અને બાંગ્લાદેશ બંને માટે ચિંતાજનક ગણાવી હતી અને કહ્યું હતું કે તે ક્ષેત્રીય શાંતિ અને સ્થિરતાને અસર કરી શકે છે.
