Gujarat
કરચોન ગામે બસની બ્રેક ફેઈલ થતા ભયાનક અકસ્માત, 10થી વધુ ઘાયલ, એકનું મોત
દાદરા નગર હવેલીના દૂધની રોડ પર કરચોન ગામે એક ગંભીર બસ અકસ્માત થયો છે, જેમાં 10થી વધુ મુસાફરો ઘાયલ થયા છે અને એક વ્યક્તિએ ઘટના સ્થળે જ જીવ ગુમાવ્યો છે. પ્રાપ્ત માહિતી મુજબ, નવસારીની ઓમ સાઈ ટુર્સ એન્ડ ટ્રાવેલ્સની લક્ઝરી બસમાં પ્રવાસીઓ દૂધની જેટી તરફ જઈ રહ્યા હતા, ત્યારે કરચોન ગામે એક ટર્નિંગ પર બસની અચાનક બ્રેક ફેઈલ થઈ ગઈ. બસના ચાલકે બસ પરનો કાબુ ગુમાવ્યો, અને કંડકટરે જાતને બચાવવા બસમાંથી કૂદવાનો પ્રયાસ કર્યો. દુર્ભાગ્યવશ, તે બસના પાછળના ટાયર નીચે આવી જતા તેનું ઘટના સ્થળે જ મોત થયું.
બસમાં સવાર અન્ય 10થી વધુ મુસાફરો ગંભીર રીતે ઘાયલ થયા, જેમને તાત્કાલિક સારવાર માટે ખાનવેલની સબ જીલ્લા હોસ્પિટલમાં લઈ જવાયા. આ દુર્ઘટનાએ સ્થાનિકોમાં શોક અને ચિંતાનું મોજુ પેદા કર્યું છે. પોલીસ અને સલામતી અધિકારીઓએ ઘટનાસ્થળે પહોંચી તપાસ શરૂ કરી છે.
