Gujarat
ગુજરાતના આટલા માછીમારો છે પાકિસ્તાનની જેલમાં બંધ, સરકારે આપી વિધાનસભામાં માહિતી
ગુજરાત સરકારે વિધાનસભામાં માહિતી આપતાં જણાવ્યું છે કે ગુજરાતના 560 માછીમારો પાકિસ્તાનની જેલમાં બંધ છે. આ માછીમારો ભૂલથી સરહદ પાર કરી ગયા હતા અને પાકિસ્તાની સેનાના હાથે ઝડપાઈ ગયા હતા. આ અંગે વિધાનસભામાં પ્રશ્ન ઉઠાવવામાં આવ્યો હતો. જેના જવાબમાં ગુજરાતના મત્સ્યોદ્યોગ મંત્રી રાઘવજી પટેલે જણાવ્યું હતું કે 31 ડિસેમ્બર 2022 સુધી ગુજરાતમાંથી કુલ 560 માછીમારો પાકિસ્તાનની કસ્ટડીમાં છે.
મંત્રીએ કહ્યું કે છેલ્લા બે વર્ષમાં આ 274માંથી અડધાની ધરપકડ કરવામાં આવી છે. તેમણે કહ્યું કે વર્ષ 2021માં ગુજરાતમાંથી 193 માછીમારો પાકિસ્તાને પકડ્યા હતા. અને 2022માં 81 માછીમારો પાકિસ્તાને પકડ્યા હતા. છેલ્લા બે વર્ષમાં પાકિસ્તાન દ્વારા 55 ભારતીય માછીમારોને મુક્ત કરવામાં આવ્યા છે. જેમાંથી 20 માછીમારોને 2021માં અને 2022માં 35 માછીમારોને મુક્ત કરવામાં આવ્યા હતા.
પાકિસ્તાન દ્વારા પકડાયેલા માછીમારોના પરિવારોને સરકાર દ્વારા આપવામાં આવતી સહાયના જવાબમાં ગુજરાત સરકારે માહિતી આપી હતી કે પાકિસ્તાનની જેલમાં બંધ 323 માછીમારોના પરિવારોને દરરોજ રૂ.300ની સહાય આપવામાં આવી રહી છે. વર્ષ 2021માં 300 પરિવારોને આ આર્થિક સહાય આપવામાં આવી હતી અને 2022માં 428 પરિવારોને આ આર્થિક સહાય આપવામાં આવી હતી. જણાવી દઈએ કે પાકિસ્તાન મરીન સિક્યુરિટી એજન્સીની બોટ ઈન્ટરનેશનલ મેરીટાઈમ બોર્ડર પાસે પેટ્રોલિંગ કરતી રહે છે. કોઈ ભારતીય માછીમાર ભૂલથી પણ સરહદ પાર કરે કે તરત જ તેને પકડી લે છે.
પાકિસ્તાનના માછીમારો પણ ક્યારેક સરહદ પાર કરીને ભૂલથી અહીં આવી જાય છે, જેમની ભારતીય એજન્સીઓ દ્વારા ધરપકડ કરવામાં આવે છે. સામાન્ય રીતે માછીમારો સારી સંખ્યામાં માછલી પકડવાના લોભમાં ભૂલથી સરહદ પાર કરી જતા હોય છે.
