Sports
વિરાટ કોહલી બીજી T20 મેચમાં વાપસી કરશે, જોખમમાં છે આ ખેલાડીનું સ્થાન
આવતીકાલે 14 જાન્યુઆરીએ ભારત અને અફઘાનિસ્તાન વચ્ચે બીજી T20 મેચ રમાશે. ભારતીય ટીમે પ્રથમ T20 મેચ 6 વિકેટે જીતીને શ્રેણીમાં 1-0થી લીડ મેળવી હતી. યુવા ખેલાડીઓએ પ્રથમ ટી20 મેચમાં જોરદાર પ્રદર્શન કર્યું હતું. જ્યારે શિવમ દુબેએ વિસ્ફોટક ઈનિંગ રમીને ટીમ ઈન્ડિયાને જીત અપાવી હતી. વિરાટ કોહલી અંગત કારણોસર પ્રથમ T20 મેચમાં રમ્યો ન હતો. હવે પીટીઆઈના અહેવાલ મુજબ કોહલી બીજી ટી20 મેચમાં વાપસી કરવા માટે તૈયાર છે અને તે પ્લેઈંગ ઈલેવનમાં રમશે તે લગભગ નિશ્ચિત માનવામાં આવે છે. પરંતુ કોહલીની વાપસી સાથે સ્ટાર ખેલાડી પર તલવાર લટકી ગઈ છે.
વિરાટ કોહલી વાપસી કરશે
વિરાટ કોહલી છેલ્લા એક દાયકામાં ટીમ ઈન્ડિયા માટે સૌથી મોટા મેચ વિનર તરીકે ઉભરી આવ્યો છે. ટીમ ઈન્ડિયાની સ્થિતિ ગમે તે હોય, જો કોહલી ક્રિઝ પર હોય તો ભારતની જીત શક્ય છે. હવે જો કોહલી બીજી ટી20 મેચમાં ત્રીજા નંબરે રમે છે તો તિલક વર્માને પ્લેઈંગ ઈલેવનમાંથી બહાર થવું પડી શકે છે. તિલક છેલ્લા કેટલાક સમયથી મજબૂત પ્રદર્શન કરી શક્યા નથી અને ફ્લોપ સાબિત થયા છે.
આ ખેલાડીનું સ્થાન જોખમમાં છે
તિલક વર્માએ ગયા વર્ષે વેસ્ટ ઈન્ડિઝ સામેની ત્રણ મેચની શ્રેણીમાં અણનમ 39, 51 અને 49 રન બનાવીને શાનદાર શરૂઆત કરી હતી પરંતુ તે પછી તે પછીની 13 ઈનિંગ્સમાં માત્ર એક જ અડધી સદી ફટકારી શક્યો હતો. આ 21 વર્ષના બેટ્સમેન માટે આ આંકડા પૂરતા નથી અને તેને મોટી ઇનિંગ્સ રમવાની જરૂર છે. તેણે હાલમાં ભારતીય ટીમ માટે 16 T20 મેચમાં 336 રન બનાવ્યા છે. પરંતુ હવે તેના માટે પ્લેઈંગ ઈલેવનમાં જગ્યા બનાવવી મુશ્કેલ લાગી રહી છે.
આ ખેલાડીઓ સારૂ પ્રદર્શન કરવા ઈચ્છશે
ભારતીય ટીમે જૂનમાં યોજાનાર વર્લ્ડ કપ પહેલા અન્ય કોઈ ટી-20 સિરીઝ રમવાની નથી. આવી સ્થિતિમાં અફઘાનિસ્તાન સામેનું પ્રદર્શન ઘણું મહત્વનું છે. જીતેશે ઈશાન કિશનને પાછળ રાખીને વિકેટ કીપર બેટ્સમેનની રેસમાં પોતાને આગળ કરી દીધા છે. તેણે લોઅર મિડલ ઓર્ડરમાં કેટલીક ઉપયોગી ઇનિંગ્સ રમી છે અને તે પોતાનો દાવો દાખવવા માટે મોટી ઇનિંગ્સ રમવા પર ધ્યાન આપશે. બીજી તરફ, શુભમન ગિલ, શિવમ દુબે, રિંકુ સિંહ અને અક્ષર પટેલ જેવા ખેલાડીઓ પણ સારી રમત બતાવવા માંગે છે, જેથી તેઓ T20 વર્લ્ડ કપ 2024 માટે પોતાનો દાવો મજબૂત કરી શકે.
